為熊本加油 籌款逾百萬

日期: 17/05/2016

資料來源：am730 

熊本熊(Kumamon)嘅家鄉上月16日發生大地震，到噚日啱啱1個月，Ray就喺呢個時候收到香港日本文化協會通知，佢哋早前舉辦嘅「加油Box」籌款活動，喺短短兩星期間籌到超過100萬元。

 

對於港人嘅熱心，日本駐港總領事松田邦紀代表日本政府向港人表示衷心感謝，希望熊本縣能夠盡快恢復舊貌接待香港旅客，佢仲話正努力爭取香港直航熊本班機復航。仲有，熊本駐港事務所所長西山英樹亦話，將會爭取熊本熊早日來港，親自向善心嘅港人致謝。

 

另外，協會亦為呢次籌款做咗個小統計，佢哋喺呢段期間所擺放嘅338個「加油Box」，收到嘅除了九成以上為港幣外，仲有各國貨幣，包括人民幣、日圓、美元、新台幣，以至印尼盾、菲律賓披索及中東國家阿聯酋等地捐款都有。若以平均每人捐款20元計，估計涉及約4.5萬人次獻出愛心。